რა არის ვალუტის გაცვლითი კურსი — ფიქსირებული და მცურავი

ვალუტის გაცვლითი კურსი

ვალუტის გაცვლითი კურსი არის ერთი ქვეყნის ვალუტის ღირებულება, გამოხატული მეორე ქვეყნის ვალუტის ერთეულებში ყიდვა-გაყიდვისას.

კურსი ყოველდღე იცვლება, რადგან მოთხოვნა-მიწოდებაზეა დამოკიდებული. ლარის სიძლიერესა და სანდოობაზე განსაკუთრებული პასუხისმგებლობა ეროვნულ ბანკს აკისრია.

საქართველოს ეროვნული ვალუტა 1995 წლიდან ლარია. გარკვეული გამონაკლისების გარდა, ლარი გადახდის ერთადერთი კანონიერი საშუალებაა.

ფიქსირებული თუ მცურავი გაცვლითი კურსი

საქართველოში მცურავი გაცვლითი კურსი მოქმედებს. ამ რეჟიმის დროს გაცვლითი კურსი ბაზრის მოთხოვნა-მიწოდებისა და მაკროეკონომიკური ფაქტორების საფუძველზე ყალიბდება. სავალუტო ბაზარზე ვალუტების ყიდვა-გაყიდვა ხდება და რომელ ვალუტაზეც მეტი მოთხოვნაა, ის მეტად მყარდება.

ფიქსირებული გაცვლითი კურსის დროს ადგილობრივი ვალუტა რომელიმე სხვა ქვეყნის ვალუტასთან ან რამდენიმე ვალუტასთან არის მიბმული. 1998 წლამდე ქართული ლარი აშშ დოლარზე იყო მიბმული.

1998 წლიდან თავისუფალი მცურავი გაცვლითი კურსი გვაქვს, თუმცა ის მართვადი მცურავი კურსის ნიშნებსაც ატარებს. ეროვნულ ბანკს სავალუტო ინტერვენციებით შეუძლია ლარის კურსზე გავლენის მოხდენა და სავალუტო აუქციონზე დოლარის გაყიდვით ლარის გამყარება.

ეროვნული ბანკის კურსი სამუშაო დღეებში, დაახლოებით 17:00 საათზე ქვეყნდება და მომდევნო დღეს ამოქმედდება. პარასკევს გამოქვეყნებული კურსი შაბათს, კვირას და ორშაბათს მოქმედებს.